N’aplicación de lo que se dispón n’artículu 14.2 de la Llei 39/2015, de 1 d’ochobre, del Procedimientu Alministrativu Común de les Alministraciones Públiques, qu’establez la obligatoriedá de les persones xurídiques, de les entidaes ensin personalidá xurídica y de quien representen a un interesáu obligáu, de rellacionase al traviés de medios electrónicos coles Alministraciones Públiques pa la realización de cualquier trámite d’un procedimientu alministrativu, dende’l 2 d’ochobre del 2016, fecha d’entrada en vigor de la Llei mentada, toles solicitúes d’un interesáu obligáu a rellacionase per medios electrónicos cola Alministración del Principáu d’Asturies habrán presentase electrónicamente al traviés del Rexistru electrónicu de l'Alministración del Principáu d’Asturies o al traviés del Rexistru Electrónicu de l’Alministración del Estáu.

Pa llevar a cabu la solicitú per vía electrónica, va haber que cuntar con un certificáu electrónicu de persona física con representación de persona xurídica asociáu al NIF de la empresa, o de persona física con representación d’entidá ensin personalidá xurídica. Más información sobre los certificaos de firma de persona física representante de persona xurídica o entidá ensin personalidá xurídica nesti enllaz.

Han usase los formularios normalizaos disponibles na sede electrónica del Principáu d’Asturies, entrando en Servicios y Trámites, siendo posible buscar por tema y clas de solicitú.

Si hai dalguna incidencia a lo llargo del procesu, puen ponese en contactu cola Alministración del Principáu d’Asturies.