L'accesu a los conteníos y a los conxuntos de datos que l'Alministración del Principáu d'Asturies publica nesti sitiu web supón l'aceptación de los presentes Llicencies y Términos d'Usu, que tienen por oxetu la protección y promoción del compromisu que l'Alministración del Principáu d'Asturies tien cola reutilización de la información del sector públicu y, d'esta miente, permite que los destinatarios de los conteníos y de los conxuntos de datos contribuyan al crecimientu de la comunidá per aciu l'aportación de los beneficios llograos pola esplotación de los mesmos.
Si tien duldes o deseya realizar comentarios sobre les Llicencies y Términos d'Usu, por favor, póngase en contactu con nós llamando al teléfonu 012 d'Atención Ciudadana, o al traviés de la siguiente dirección electrónica: sac@asturias.org.
Llicencia aplicable a los conteníos y a los conxuntos de datos
Nel conxuntu de los conteníos y de los datos que l'Alministración del Principáu d'Asturies publica nesta sitiu web o pueda publicar nel futuru, concurren o puen concurrir derechos de propiedá intelectual propios, de los que l'Alministración del Principáu d'Asturies ye titular, colos derivaos de la normativa de reutilización de la información del sector públicu.
Propiedá intelectual
L'exerciciu de los derechos de propiedá intelectual de les alministraciones y organismos del sector públicu ha realizase de forma que se facilite la so reutilización, polo que los conteníos y los conxuntos de datos qu'ufierta l'Alministración del Principáu d'Asturies, si nun s'indica lo contrario, publíquense baxo los términos de la llicencia Creative Commons-Reconocencia (CC-by 4.0) que permite:
- Que se puedan copiar, distribuyir y sopelexar públicamente,
- Que puedan sirvir como base a obres derivaes como resultáu del so análisis o estudiu,
- Que puedan utilizase con fines comerciales y non comerciales.
- Que se puedan modificar, tresformar y adaptar, publicando al tiempu los cambeos mentaos.
Obligación de reconocencia de l'autoría
La utilización,producción, cambéu o distribución de los conteníos o de los conxuntos de datos supón, baxo los términos de la llicencia Creative Commons Reconocencia (CC-by 4.0), la obligación de reconocer l'autoría y citar a l'Alministración del Principáu d'Asturies como la fonte de los conteníos o de los conxuntos de datos, enllazando a la páxina web oficial de l'Alministración del Principáu d'Asturies de la forma siguiente:
- Orixe de los conteníos: Alministración del Principáu d'Asturies
- Orixe de los datos: Alministración del Principáu d'Asturies
Reutilización de la información del sector públicu
L'Alministración del Principáu d'Asturies tien, n'aplicación de la Llei 37/2007, de 16 de payares, sobre reutilización de la información del sector públicu, el derechu de publicar conteníos y conxuntos de datos pa los que seya necesario satisfacer el pagu de contraprestaciones económiques en forma de tasa o preciu públicu. La cuantía de les contraprestaciones mentaes va tener como oxetivu permitir, polo menos, que se cubra los costos del serviciu o actividá, teniendo d'incluyise en dichos costos los relativos a la recoyida, producción, reproducción y espardimientu, nun pudiendo, en nengún casu, ser superior a los mesmos. El llistáu cola cuantía de les contraprestaciones aplicables va atopase a disposición pública de forma concurrente a la publicación de los conxuntos de datos.
La reutilización de los conteníos y de los datos ta abierta a tolos axentes del mercáu de la reutilización de la información, quien van tar obligaos, amás, a mentar la fecha de la última actualización de la información. Nun se dexa:
- Que se desnaturalice o desvirtúe’l sentíu de la información na so reutilización.
- La utilización en réxime d'esclusividá.
Cambeos nos conxuntos de datos y nos términos d'usu
L'Alministración del Principáu d'Asturies va poder, en cualesquier momentu, añedir, esaniciar o modificar los conteníos y los conxuntos de datos publicaos o les presentes Llicencies y Términos d'Usu. L'anunciu de dichos cambeos va publicase pola Alministración del Principáu d'Asturies nel llugar que considere más relevante pa la so conocencia y espardimientu públicu. Cualesquier cambéu que se lleve a cabu va ser efectivu dende'l momentu de la so publicación nun siendo que se notifique lo contrario.
Tou cambéu o tresformación que se faiga sobre los conteníos y los conxuntos de datos que publica l'Alministración del Principáu d'Asturies ha identificase como tal nel momentu de la so distribución.
Garantía de los conxuntos de datos. Esclusión de responsabilidá
L'Alministración del Principáu d'Asturies nun ufierta nengún tipu de garantía al respective de los conteníos y los conxuntos de datos publicaos, polo que nun pue asegurar, a pesar de los esfuerzos por xestionar de forma afayadiza los mesmos, la so integridá, actualización, precisión o accesu continuu a dichos conxuntos de datos.
La utilización de los conteníos y los conxuntos de datos va realizase per parte de los usuarios o axentes de la reutilización baxo la so propia cuenta y riesgu. Tanto l'Alministración del Principáu d'Asturies como cualesquier de los sos organismos, nun se fai responsable de los daños sufríos o perdes económiques que, de forma directa o indirecta, produzan o puedan producir perxuicios económicos, materiales o sobre datos, provocaos pol usu de los conteníos y los conxuntos de datos.
Responsabilidá del usuariu o axente de la reutilización
L'usuariu o axente de la reutilización de los conteníos y los conxuntos de datos tópase sometíu a la normativa aplicable nel territoriu de la Comunidá Autónoma del Principáu d'Asturies y, especialmente, al réxime sancionador previstu nel artículu 11 de la Llei 37/2007, de 16 de payares, sobre reutilización de la información del sector públicu, asina como a tola normativa qu'afecte al usu de la información, como la Llei del Principáu d'Asturies 8/2018, de 14 de setiembre, de Tresparencia, Bon Gobiernu y Grupos d'Interés, el Reglamentu (UE) 2016/679 del Parlamentu Européu y del Conseyu de 27 d'abril del 2016, la Llei Orgánica 15/1999, de protección de datos de calter personal y el Real Decretu Lexislativu 1/1996, de 12 d'abril, pol que s'aprueba'l Testu refundíu de la Llei de propiedá intelectual.
Amás, si como resultáu del incumplimientu de les Llicencies y Términos d'Usu espuestos nesti documentu, l'Alministración del Principáu d'Asturies o dalguna de les sos empreses públiques fuera oxetu d'acciones llegales o fuera sancionáu económicamente, la persona o entidá qu'utilice, reproduza, modifique o distribuya los conteníos y los conxuntos de datos va responder énte l'Alministración del Principáu d'Asturies de cuantos gastos, inclusive procesales, sanciones o indemnizaciones pudieren declarase, dexando a la mesma totalmente indemne.
D'esta miente la persona o entidá qu'utilice, reproduza, modifique o distribuya los conteníos y los conxuntos de datos acepta indemnizar, asina como eximir l'Alministración del Principáu d'Asturies y a tolos sos órganos y empreses públiques, de cualesquier responsabilidá na que pudiera incurrir debíu a les reclamaciones que pudieren aniciase pol incumplimientu d'estes Llicencies y Términos d'Usu o'l simple usu, reproducción, cambéu o distribución de la información.
L'Alministración del Principáu d'Asturies, pela so parte, acútase'l derechu de tomar les correspondientes midíes llegales pa velar polos sos intereses, ensin qu'ello suponga arrenunciar a la defensa y indemnización per parte de la persona o entidá qu'utilice, reproduza, modifique o distribuya los conteníos y los conxuntos de datos.
Cancelación por incumplimietu
L'Alministración del Principáu d'Asturies va poder atayar o suspender l'accesu a los conteníos y los conxuntos de datos ensin avisu previu a cualesquier que l'Alministración del Principáu d'Asturies, según el so criteriu unillateral, considere que ta incumplimientu preséntesles Llicencies y Términos d'Usu, la llegalidá vixente o utilice, reproduza, modifique o distribuya los conteníos y los conxuntos de datos d'una manera perxudicial pa terceros.
Nel casu de cancelación o suspensión, la persona o entidá nun volverá ser autorizada a utilizar o reproducir los conteníos y los conxuntos de datos y, amás, l'Alministración del Principáu d'Asturies va poder utilizar cualesquier mediu al so algame pa que se faiga efectiva la so decisión. Dicha cancelación o suspensión nun va tener efectu sobre aquelles persones o entidaes de bona fe que recibieren los conteníos y los conxuntos de datos al traviés de la persona o entidá sancionada y que, d'otra forma, tean cumpliendo estes Llicencies y Términos d'Usu.
Les decisiones que l'Alministración del Principáu d'Asturies pueda tomar a esti respectu van poder ser impugnaes énte los órganos xudiciales competentes señalaos nes presentes Llicencies y Términos d'Usu.
Astención d'usu del nome del Principáu pol usuariu
Nun se va poder, de forma pública, indicar, dar a entender o suxurir que l'Alministración del Principáu d'Asturies o cualesquier otra institución del Principáu participa, patrocina o sofita l'usu o reproducción específica qu'una persona o entidá realice sobre los conteníos y los conxuntos de datos, debiéndose la mesma abstenese de la utilización de cualesquier denominaciones escrites o gráfiques, visuales o auditives o de cualesquier otra naturaleza que puedan suxurir tracamundiu nel usuariu final de la participación o sofitu pola Alministración del Principáu d'Asturies na actividá del utilizador de la información o del conxuntu de datos.
Escudu del Principáu d'Asturies
L'Escudu nun va poder ser utilizáu como símbolu d'identificación por nenguna otra institución pública o privada que nun seya’l Principáu d'Asturies. Nun se va almitir nengún usu que vaiga n'acabamientu de la so alta significación.
Encamientu
Encamiéntase a toles persones o entidaes qu'utilicen, reproduzan, modifiquen o distribuyan los conteníos y los conxuntos de datos, a que pongan en conocencia de l'Alministración del Principáu d'Asturies tolos proyectos rellacionaos o derivaos del usu de los conteníos y los conxuntos de datos, de mou que seyan espuestos de forma pública cola fin d'aguiyar les polítiques de reutilización d'información del sector públicu y aprovechamientu común por tolos usuarios y axentes.