Saltar al contenido principal

Gobierno del Principado de Asturias

Asturias, mucho más cerca

fnd_sedeElectronica_es.jpg
 

La Gaita

La Gaita

De tolos instrumentos musicales que formen l'ampliu campu de la música popular, la gaita ye ún de los más embruxiladores, tanto pola so apariencia esterna y el soníu gayoleru, como pola función social que tien.

La so nacencia piérdese na nueche de los tiempos. Anque la mayoría de los investigadores y musicólogos coinciden n'atribuyi-y una antigüedá anterior a la era cristiana y un orixe mesopotámicu, hitita o sumeriu; lo único que paez tar claro ye que llegaría a Roma al través de les conquistes n'Oriente y que sedríen los propios romanos los que la espardiríen per tol Imperiu.

Cuesta facer una clasificación de les gaites, yá qu’habeles hailes cuasi per tol mundu. Amás de n'Europa, esisten diferentes tribes n'Asia, en Norteafrica y Arabia, pero, ensin dulda, d'esta estensa familia, les más conocíes son les de triba europeo-occidental (asturiana, gallega, escocesa, etc..)

Esti climen de gaita compónse d'un depósitu d'aire, dos o más tubos sonoros, según tengan dos o trés roncones, y un tubu auxiliar (soplete o portavientu) pa introducir l'aire nel fuelle.
Lleven amás unes llingüetes,dobles nel punteru y cencielles nos roncones (les payueles y payones), que son les que realmente producen el soníu y son l'alma de la gaita.

Toes estes gaites son bastante paecíes ente elles y anque la más evolucionada seya la escocesa nos últimos años tamíen los artesanos asturianos, gallegos y bretones consiguen, calteniendo la tradición, unes gaites cada vegada más calidables.

La gaita asturiana esperimentó nestos últimos años una gran evolución, pasando de ser una de les más primitives a ocupar un sitiu destacáu nel mundu cola invención de la gaita llétrica.

Teniendo en cuenta'l tonu, les gaites asturianes divídense en trés frasques distintes: grillera, redonda y tumbal. La grillera ye la más aguda y chillona de les trés, y anque enantes yera la más usada, agora limitase'l so usu al acompañamientu de los grupos de danza o en pareyes aislaes de gaita y tambor.

La redonda ye la más usada anguaño. Tien un soníu más anchu y agradable que la grillera y úsase p’acompañar la tonada o canción asturiana, pa tocar nos grupos folk y pop y ye tamién la más usada nes bandes de gaites y tambores. La tumbal tien una sonoridá más profunda y grave y ye la más amañosa p’acompañar les voces graves na canción y nes mises de gaita. Usáse tamién nes bandes de gaites y nos grupos folk.

Hai escueles de gaiteros bien estremaes, coles sos diferentes técniques, estilos y formes d'espresión. Si tuviéremos que mentar dalgunos gaiteros famosos tendríemos qu’emprimar pol de Lliberdón, Ramón Garcia Tueru, que tocaba y cantaba al mesmu tiempu y que fixo xires per Europa ya Hispanoamerica. Y al par, José Remis Vega, el Gaiteru de Margolles, creador del estilu Remis, espardíu depués pol so fíu José Remis Ovalle, que foi Gaiteru Mayor d'Asturies y d'España y fixo tamién xires per Europa y América.

Aparte de ser l'instrumentu más representativu de la música popular asturiana, la gaita ye imprescindible na inmensa mayoría d’actividaes que se desendolquen na rexón. Amás de les pareyes típiques de gaiteros y tamboriteros qu’amenicen les romeríes, la gaita forma parte del repertoriu de los grupos de danza y bailles tradicionales y xuega un papel perimportante na tonada asturiana. Otra de les facetes tradicionales de la gaita ye’l so emplegu como instrumentu relixosu pal acompañamientu de mises, procesiones y demás lliturxes.

Dende mediaos los años 70, nos que los grupos del Nuevu Canciu Astur incorporen la gaita nes sos grabaciones discográfiques y nes actuaciones en directo, la llinia siguida ye ascendente ya imparable, tando presente anguaño n'orquestes, grupos de folk, rock, pop, etc y mui especialmente al traviés de les bandes de gaites, numberoses formaciones de gaiteros y gaiteres cada vegada más espardíes y demandaes pa toa mena d'actos festivos o institucionales.

El fenómenu Hevia, que nun se pue llamar d'otra manera, cabezaleru nes llistes d'ésitos y convertíu en númberu ún mundial, vistió esti vieyu instrumentu cola tecnoloxía del sieglu XXI, abriendo puertes a los artistes asturianos del nuevu mileniu.

Titulo Contacta

Servicio de atención ciudadana