Saltar al contenido principal

Gobierno del Principado de Asturias

Asturias, mucho más cerca

banda de sede
 

Estás en

Asturias.es Sede Electrónica BOPA y Legislación Resultados Buscador BOPA

Consulta de una disposición

Disposición anterior | Disposición siguiente


Boletín Nº 170 del jueves 23 de julio de 2015

OTRAS DISPOSICIONES

CONSEYERÍA D'EDUCACIÓN, CULTURA Y DEPORTE

Resolución de 14 de xunetu del 2015, de la Conseyería d’Educación, Cultura y Deporte, pola que s’aprueba la convocatoria en réxime de concurrencia competitiva de subvenciones pa la promoción de la música n’asturianu y en gallego-asturianu.

Examináu l’espediente de referencia, resulten los siguientes

Antecedentes

Primero.—L’Estatutu d’Autonomía del Principáu d’Asturies y la Llei 1/98, de 23 de marzu, d’Usu y Promoción del Bable/Asturianu señalen como competencia del Principáu’l fomentu y la protección del asturianu nes sos distintes variedades que, como modalidaes llingüístiques, s’usen nel territoriu del Principáu d’Asturies, mesmo que del gallego-asturianu nel so ámbitu.

De magar l’aprobación d’esta normativa, el Principáu d’Asturies asumió la dirección, coordinación y execución de les actividaes rellacionaes col asturianu y vien estableciendo midíes específiques de promoción del mesmu, respetando siempres los principios de llibertá y voluntariedá nel so usu pola ciudadanía. Ente estes midíes ta la de la convocatoria de subvenciones o ayudes que permitan fomentar l’usu del asturianu y del gallego-asturianu n’iniciatives particulares, empresariales o asociatives y, en xeneral, como vehículu d’espresión cultural.

Segundo.—La xestión de la política llingüística ta integrada nel ámbitu de la Conseyería d’Educación, Cultura y Deporte acordies colo que se dispón nel Decretu 4/2012, de 26 de mayu, de Reestructuración de les Conseyeríes qu’integren l’Alministración de la Comunidá Autónoma, en relación col Decretu 74/2012, de 14 de xunu, pol que s’establez la estructura orgánica básica d’aquella.

Tercero.—Por Resolución de la Conseyería d’Educación, Cultura y Deporte de 20 de xunu del 2014 (BOPA de 27 de xunu del 2014) aprobáronse les bases reguladores de subvenciones pa la promoción del llibru n’asturianu y en gallego-asturianu.

Cuarto.—Por Resolución de 16 de febreru del 2015 de la Conseyería d’Educación, Cultura y Deporte (BOPA n.u 47, de 26 de febreru del 2015) apruébase’l Plan Estratéxicu de Subvenciones pal exerciciu 2014, y nel so Anexu I ta incluyida la llinia de subvenciones pa la promoción de la música n’asturianu y en gallego-asturianu.

Quinto.—Por Resolución de 1 de xunetu del 2015, de la Conseyería d’Educación, Cultura y Deporte (BOPA n.u 157, de 8 de xunetu del 2015) apruébase la primer modificación de les Bases reguladores de la concesión de subvenciones pa la promoción de la música n’asturianu y, nel so ámbitu, en gallego-asturianu, en réxime de concurrencia competitiva.

Sesto.—Acordies colo dispuesto na Resolución de 16 de mayu del 2005, de la Conseyería d’Economía y Alministración Pública, pola que s’establez el sistema d’información contable de l’Alministración del Principáu d’Asturies y el so sector públicu y s’aprueben les normes sobre los procedimientos de xestión, tramitación y réxime de contabilidá na execución del presupuestu de gastos, la Intervención Delegada, en fecha 13 de xunetu del 2015, emitió’l correspondiente informe fiscal favorable.

Fundamentos de derechu

Primero.—La Llei 38/2003, de 17 de payares, Xeneral de Subvenciones, establez nel so artículu 22 que’l procedimientu ordinariu de concesión de subvenciones tramítase en réxime de concurrencia competitiva, esto ye, pente medies de l’aprobación de la convocatoria pública correspondiente previa aprobación de les bases reguladores de la mesma. Coles mesmes, el Decretu 71/1992, de 29 d’ochobre, que regula’l Réxime Xeneral de Concesión de Subvenciones, establez nos sos artículos 6.2 y 7 que la concesión de subvenciones innominaes y xenériques nel ámbitu de la comunidá autónoma del Principáu d’Asturies faise por convocatoria pública, previa aprobación de les bases reguladores de la mesma.

Segundo.—La competencia p’aprobar les bases y convocar la concesión de la subvención correspuende a la Conseyería d’Educación, Cultura y Deporte, tal que s’establez nel artículu 38 de la Llei del Principáu d’Asturies 6/1984, de 5 de xunetu, del Presidente y del Conseyu de Gobiernu, y nel artículu 5 del Decretu 4/2012, de 26 de mayu, de Reestructuración de les Conseyeríes qu’integren l’Alministración de la Comunidá Autónoma.

Tercero.—L’autorización del gastu ye competencia de la persona titular de la Conseyería d’Educación, Cultura y Deporte, acordies colo que s’establez nel artículu 41 del Testu Refundíu del Réxime Económicu y Presupuestariu, aprobáu por Decretu Llexislativu del Principáu d’Asturies 2/1998, de 25 de xunu, en relación col artículu 8.1 de la Llei del Principáu d’Asturies 11/2014, de 29 d’avientu, de Presupuestos Xenerales pal 2015.

Cuarto.—La Llei 38/2003, de 17 de payares, Xeneral de Subvenciones, establez nel so artículu 23.2 el conteníu mínimu de les convocatories aprobaes pol órganu competente.

Quinto.—Esta convocatoria, abierta a la participación d’entidades que desenvuelven actividaes económiques, atópase suxeta al Reglamentu (UE) n.u 1407/2013 de la Comisión, de 18 d’avientu del 2013, relativu a l’aplicación de los artículos 107 y 108 del Tratáu de Funcionamientu de la Unión Europea a les ayudes de minimis (DOUE L 352, de 24/12/2013), norma esta d’algame xeneral, aplicable directamente y obligatoria en tolos sos elementos.

Sesto.—Existe creitu amañosu y suficiente na aplicación presupuestaria 14.04.422R.472.001 de los Presupuestos Xenerales del Principáu d’Asturies pal exerciciu 2015.

D’esta miente, vistos los preceptos llegales citaos y demás d’aplicación xeneral, pola presente

RESUELVO

Primero.—Autorizar un gastu destináu a la presente convocatoria, por importe de 20.000 € (venti mil euros), con cargu a l’aplicación presupuestaria 14.04.422R.472.001, de los Presupuestos Xenerales del Principáu d’Asturies pal exerciciu 2015.

Segundo.—Aprobar la convocatoria pública de subvenciones, en réxime de concurrencia competitiva, pa la promoción de la música n’asturianu y en gallego-asturianu, que va llevase alantre acordies coles prescripciones que darréu s’indiquen:

1.—Oxetu

1.1. Esta convocatoria tien como oxetu la concesión d’ayudes económiques, en réxime de concurrencia competitiva, a empreses privaes pa la promoción de la música n’asturianu y en gallego-asturianu, que se realice en diferentes soportes físicos o dixitales, colos requisitos establecíos tanto nes bases reguladores como nesta convocatoria pública de subvenciones.

A los fines de la normalización social, l’asturianu o, nel so casu, el gallego-asturianu, ha ser la llingua normal y vehicular na qu’aparezan les lletres de los cantares y tolos testos impresos o dixitales qu’acompañen a la obra musical. Coles mesmes, pelo menos la metá de los temes del discu han tar escritos y ser cantaos n’asturianu o gallego-asturianu.

Los proyectos subvencionables van ser los que se lleven alantre nel exerciciu d’esta convocatoria (hasta la fecha máxima de xustificación marcada na mesma) o nos meses de payares y avientu del exerciciu anterior.

1.2. Ensin perxuiciu de la posible presentación de dellos proyectos por cada solicitante, namás pueden ser oxetu de subvención un máximu de tres de los proyectos presentaos. Nesi casu, van considerase desestimaos de manera automática los proyectos presentaos por una mesma solicitante que sacaren puntuación peor en comparanza colos sos proyectos meyor puntuaos.

2.—Réxime xurídicu

Ensin perxuiciu de lo que se dispón na Llei Xeneral de Subvenciones y el Reglamentu (UE) n.u 1407/2013 de la Comisión, de 18 d’avientu del 2013, relativu a l’aplicación de los artículos 107 y 108 del Tratáu de Funcionamientu de la Unión Europea a les ayudes de minimis (DOUE L 352, de 24/12/2013), esta convocatoria de subvenciones va mandase poles Bases reguladores aprobaes por Resolución de la Conseyería d’Educación, Cultura y Deporte de 20 de xunu del 2014 (BOPA de 27 de xunu del 2014) y la so modificación por Resolución de 1 de xunetu del 2015, de la Conseyería d’Educación, Cultura y Deporte (BOPA n.u 157, de 8 de xunetu del 2015), pola que s’aprueba la primer modificación de les Bases reguladores de la concesión de subvenciones pa la promoción de la música n’asturianu y, nel so ámbitu, en gallego-asturianu, en réxime de concurrencia competitiva.

3.—Gastos subvencionables

Los gastos subvencionables van ser los que s’establecen na base V de la Resolución de la Conseyería d’Educación, Cultura y Deporte de 20 de xunu del 2014 (BOPA de 27 de xunu del 2014), pola que s’aprueben les bases reguladores de la concesión de subvenciones pa la promoción de la música n’asturianu y en gallego-asturianu, modificada por Resolución de 1 de xunetu del 2015, de la Conseyería d’Educación, Cultura y Deporte (BOPA n.u 157, de 8 de xunetu del 2015), pola que s’aprueba la primer modificación de les Bases reguladores de la concesión de subvenciones pa la promoción de la música n’asturianu y, nel so ámbitu, en gallego-asturianu, en réxime de concurrencia competitiva.

Los gastos indirectos del proyectu van ser subvencionables hasta un máximu del 10% del presupuestu aprobáu, siempres que seyan necesarios y xustificaos pal so desenvolvimientu, y s’estableza a les clares el porcentaxe d’imputación de los mesmos nel presupuestu presentáu.

4.—Requisitos pa solicitar la subvención y forma d’acreitalos

4.1. Puede participar nesta convocatoria como solicitante cualesquier empresa privada (persona física o xurídica) dedicada a la producción musical y que tenga’l so domiciliu social, establecimientu o delegación comercial nel Principáu d’Asturies. La empresa ha cumplir los requisitos establecíos na base III de la Resolución de la Conseyería d’Educación, Cultura y Deporte de 20 de xunu del 2014 (BOPA de 27 de xunu del 2014), modificada por Resolución de 1 de xunetu del 2015, de la Conseyería d’Educación, Cultura y Deporte, pola que s’aprueben les bases reguladores de la concesión de subvenciones pa la promoción de la música n’asturianu y en gallego-asturianu.

4.2. La solicitú ha presentase nel modelu normalizáu que s’incorpora como Anexu I a esta convocatoria. Ha presentase una solicitú por cada proyectu.

La solicitú tien d’acompañase de los documentos que s’indiquen de siguío:

— Nel casu de persona física:

Fotocopia del DNI o autorización al órganu instructor pa que pueda consultar los datos d’identidá al ministeriu competente en materia d’Interior.

Fotocopia del últimu recibu d’ingresu de cuota del Réxime Especial de Trabayadores Autónomos.

— Nel casu d’entidá xurídica:

Fotocopia del NIF.

Fotocopia d’escritura de constitución y les sos modificaciones.

DNI de la persona qu’actúe como representante de la entidá o autorización al órganu instructor pa que pueda recabar los certificaos d’identidá al ministeriu competente en materia d’Interior. Tala condición de representante habrá acreditase a la fecha de presentación de la solicitú.

— Tanto les personas físiques como xurídiques han presentar:

Documentu actualizáu acreitativu de tar d’alta nel epígrafe correspondiente del IAE y informe de situación d’alta de la entidá solicitante nel Sistema de la Seguridá Social a la fecha de presentación de la solicitú. El conteníu de la documentación aportada conforme a esti apartáu habrá acreitar que la entidá cumple coles condiciones pa ser beneficiaria d’estes ayudes, según lo que se prevé nel puntu 4.1.

Documentación acreitativa de que la entidá solicitante tien el so domiciliu social, establecimientu o delegación comercial nel Principáu d’Asturies.

Certificación acreitativa de que la entidá ta al corriente de les sos obligaciones tributaries, de nun tener deudes cola Facienda del Estáu, nin cola Facienda del Principáu d’Asturies y del pagu de cotizaciones a la Seguridá Social. La persona o entidá solicitante podrá autorizar al órganu instructor pa que recabe los certificaos a emitir pola Axencia Estatal de l’Alministración Tributaria, la Tesorería de la Seguridá Social y l’Ente Tributariu del Principáu d’Asturies.

Declaración responsable de la persona que represente a la entidá, tocante a nun tar incursa esta nes prohibiciones p’algamar la condición de beneficiaria, previstes nel artículu 13 de la Llei 38/2003, de 17 de payares, Xeneral de Subvenciones, y de tener xustificaes les subvenciones y ayudes concedíes con anterioridá pola Comunidá Autónoma.

Declaración responsable relativa a otres subvenciones, ayudes, ingresos o recursos solicitaes y, nel so casu, concedíes pa la mesma finalidá, por cualesquier Alministración Pública o entes públicos o privaos, nacionales o internacionales, con indicación de la entidá concedente, fecha y importe; en casu contrariu, declaración de que nun solicitó ayuda nenguna pa la realización d’esta actividá.

Declaración responsable de la veracidá de los datos incluyíos na solicitú.

Ficha d’acreedores acompañada, según proceda, de fotocopia del DNI o NIF de la empresa, cumplimentada de manera correcta y tramitada pola entidá bancaria. Esti documentu ha presentase namás cuando se solicite subvención del Principáu d’Asturies por primer vegada, o cuando se produxera dalgún cambéu que tenga de ser conseñáu na mesma.

Proyectu detalláu, en formatu papel y coles sos páxines numberaes, que tien d’incluyír como conteníu imprescindible los datos siguientes:

Calendariu de realización y execución del proyectu. El proyectu ha tener como fecha máxima d’execución la fecha máxima de xustificación establecida nesta convocatoria.

Datos del soporte y númberu d’exemplares.

Intérpretes o músicos principales, especificando la so trayectoria.

Númberu de cantares y les sos lletres.

Instrumentación, producción musical, nel so casu, y estudiu de grabación.

Trayectoria de la empresa discográfica n’actividaes de producción y edición musical, o de los profesionales de la mesma que s’encarguen del proyectu.

Presupuestu equilibráu y firmáu —qu’incluya les partíes que lu integren, recoyendo los gastos y ingresos de l’actividá pa la que se solicita ayuda— onde s’indique l’aportación económica de la persona o entidá solicitante pal desenvolvimientu de l’actividá; esta ha ser, pelo menos, d’un 20% del presupuestu total de l’actividá. Nesti presupuestu ha facese constar l’importe de l’ayuda económica solicitada pola entidá peticionaria, que nun va poder pasar del 70% del presupuestu total del proyectu.

Nel casu de que la persona o entidá peticionaria solicite ayuda económica pa más d’un proyectu na mesma convocatoria, ye bastante con axuntar la documentación anterior con ún de los proyectos, indicando nes otres solicitúes esta circunstancia y identificando a les clares el proyectu que contién la documentación completa axunta.

Sicasí lo anterior, ha presentase de manera obligatoria y individualizada, por cada solicitú y proyectu, la documentación siguiente:

Declaraciones responsables.

Proyectu detalláu.

Presupuestu del proyectu.

Cantidá económica de l’ayuda solicitada.

4.3. Arriendes de la documentación referida nel apartáu anterior, acordies col artículu 6 del Reglamentu (UE) n.u 1407/2013 de la Comisión, de 18 d’avientu del 2013, relativu a l’aplicación de los artículos 107 y 108 del Tratáu de Funcionamientu de la Unión Europea a les ayudes de minimis, la persona o entidá solicitante ha presentar declaración, escrita o en soporte electrónicu, tocante a toles demás ayudes de minimis recibíes mientres los dos exercicios fiscales anteriores y mientres l’exerciciu fiscal en cursu que tean suxetes al Reglamentu mentáu o a otros reglamentos de minimis. Esta declaración incorporaráse nel modelu de solicitú.

Nun van subvencionase, en casu nengún, proyectos d’entidaes solicitantes nos que l’importe total de les ayudes de minimis concedíes pase de 200.000 euros mientres cualesquier periodu de tres exercicios fiscales.

5.—Comisión de Valoración y órganu competente pa la instrucción y resolución del procedimientu

5.1.—La comisión va tar presidida pola persona titular de la Dirección Xeneral competente en materia de política llingüística (o persona na que delegue), y integrada por un mínimu de tres y un máximu de cinco persones que van actuar en calidá de vocales, de les que pelo menos dos han ser personal adscrito al órganu instructor y les otres podrán ser persones vinculaes al ámbitu de la llingua y cultura asturiana. Va actuar como Secretariu/a un empleáu públicu o una empleada pública con adscripción a la Dirección Xeneral competente en materia de política llingüística.

Nel casu d’ausencia o enfermedá, y en xeneral cuando se dea dalguna causa xustificada, los miembros titulares de la comisión de valoración van ser sustituyíos por quien l’órganu competente nome como suplentes.

5.2.—L’órganu instructor va ser el Serviciu de Política Llingüística, y el procedimientu va resolvese por resolución de la persona titular de la Conseyería d’Educación, Cultura y Deporte.

El plazu máximu pa resolver y notificar la resolución del procedimientu va ser de seis meses. El plazu va computase de magar s’espublice la convocatoria correspondiente.

Desque trescurra’l plazu máximu ensin recaer resolución espresa, les entidaes solicitantes van poder entender desestimaes les solicitúes por silenciu alministrativu.

6.—Plazu y sitiu pa la presentación de solicitúes

6.1. Les solicitúes han presentase nel plazu de 15 díes hábiles a cuntar dende l’otru día d’espublizase esta convocatoria en BOPA. El formulariu de solicitú (Anexu I) ha acompañase de la totalidá de la documentación esixida.

Si la solicitú nun cumple los requisitos que s’establecen nesta convocatoria, l’órganu competente va pidir a la persona o entidá interesada que la igüe nel plazu máximu y improrrogable de 10 díes hábiles, con encamientu de que, si nun lo fixere asina, va considerase que desistió del so pidimientu, depués de resolución que va tener que se dictar nos términos del artículu 71 de la Llei 30/1992, de 26 de payares, de Réxime Xurídicu de les Alministraciones Públiques y del Procedimientu Alministrativu Común.

6.2. El sitiu de presentación de les instancies va ser el Rexistru Xeneral del Principáu d’Asturies (Cai Coronel Aranda, n.u 2, planta plaza, 33005 Uviéu), o per cualquiera de los sistemes establecíos n’artículu 38.4 de la Llei de Réxime Xurídicu de les Alministraciones Públiques y del Procedimientu Alministrativu Común. Si, usando esti derechu, l’espediente únviase per corréu, habrá que lu presentar en sobre abiertu pa que’l personal de correos feche y selle la solicitú primero de que se certifique.

7.—Procedimientu de concesión

7.1. El procedimientu de concesión de subvenciones va tramitase en réxime de concurrencia competitiva, na forma establecida n’artículu 24 de la Llei Xeneral de Subvenciones, coles precisiones conteníes na base XI de les bases reguladores modificaes por Resolución de 1 de xunetu del 2015, de la Conseyería d’Educación, Cultura y Deporte (BOPA n.u 157, de 8 de xunetu del 2015) pola que s’aprueba la primer modificación de les Bases reguladores de la concesión de subvenciones pa la promoción de la música n’asturianu y, nel so ámbitu, en gallego-asturianu, en réxime de concurrencia competitiva.

La resolución del procedimientu va espublizase nel Boletín Oficial del Principáu d’Asturies, produciendo esa publicación los efectos propios de la notificación y esto d’alcuerdu colo establecío n’artículu 59.6 y concordantes de la Llei de Réxime Xurídicu de les Alministraciones Públiques y del Procedimientu Alministrativu Común. Esta resolución termina la vía alministrativa y contra ella pue interponese recursu contencioso-alministrativu o, nel so casu, recursu potestativu de reposición que habrá presentase ante l’órganu que dictó la resolución.

7.2. Namás van poder recibir subvención aquellos proyectos qu’algamen o pasen la puntuación mínima de 51 puntos, por una cuantía máxima de 5.000 € por proyectu y siendo’l 70% el porcentaxe máximu subvencionable del presupuestu aprobáu axustáu.

7.3. Los proyectos van ordenase pola puntuación sacada, n’orde decreciente (de mayor puntación a menor puntuación), estableciéndose una prelación ente los mesmos cola mira de determinar el porcentaxe subvencionable del presupuestu aprobáu axustáu, que va aplicase en función de los tramos de puntuación siguientes:

Si’l proyectu saca ente 100 y 91 puntos, la cuantía de la subvención va ser el 70% del presupuestu aprobáu axustáu.

Si’l proyectu saca ente 90 y 81 puntos, la cuantía de la subvención va ser el 68% del presupuestu aprobáu axustáu.

Si’l proyectu saca ente 80 y 71 puntos, la cuantía de la subvención va ser el 66% del presupuestu aprobáu axustáu.

Si’l proyectu saca ente 70 y 61 puntos, la cuantía de la subvención va ser el 64% del presupuestu aprobáu axustáu.

Si’l proyectu saca ente 60 y 56 puntos, la cuantía de la subvención va ser el 62% del presupuestu aprobáu axustáu.

Si’l proyectu saca ente 55 y 51 puntos, la cuantía de la subvención va ser el 60% del presupuestu aprobáu axustáu.

7.4. Cuando’l creitu autorizáu nun seya abondu pa financiar les cantidaes asignaes d’alcuerdu colos criterios de valoración señalaos enantes, ha amenorgase la cuantía de les subvenciones que se concedan, repartiendo’l déficit de financiación proporcionalmente a la cantidá asignada de primeres.

8.—Criterios de valoración.

Acordies cola base X de la Resolución de la Conseyería d’Educación, Cultura y Deporte de 20 de xunu del 2014 (BOPA de 27 de xunu del 2014), la comisión va evaluar los proyectos según los criterios marcaos nes mesmes y d’alcuerdu col desglose siguiente:

Grau d’ellaboración, detalle y concreción del proyectu presentáu: hasta un máximu de 10 puntos, indicándose:

Grau máximu, que permita una valoración óptima del proyectu (con presentación de maqueta): 10 puntos.

Bon grau, que permita una valoración destacable del proyectu: 7 puntos.

Grau suficiente, que permita una valoración afayadiza del proyectu: 5 puntos.

Escasu grau, que permita una valoración mínima del proyectu: 2 puntos.

Grau nulu, que nun permita la so valoración: 0 puntos.

L’interés y la calidá artística del proyectu: hasta un máximu de 40 puntos con esti detalle:

b1) El porcentaxe de temes en llingua asturiana o gallego-asturianu que contenga’l discu: hasta un máximu de 20 puntos, indicándose:

Si tolos temes tán n’asturianu o gallego-asturianu: 20 puntos.

Si ente’l 80% y el 99% de los temes tán n’asturianu o gallego-asturianu: 15 puntos.

Si ente’l 51% y el 79% de los temes tán n’asturianu o gallego-asturianu: 10 puntos.

Si’l 50% de los temes tán n’asturianu o gallego-asturianu: 5 puntos.

b2) Va valorase, nuna escala de 0 a 20 puntos, la calidá artística del proyectu, atendiendo a criterios como’l calter innovador de la propuesta artística, el grau d’escelencia de la mesma, la calidá lliteraria de les lletres y la calidá de los intérpretes y la instrumentación.

Trayectoria de la empresa discográfica, o de profesionales d’ella que s’encarguen del proyectu, n’actividaes de producción y edición musical: hasta un máximu de 15 puntos, indicándose:

Trayectoria mui consolidada, cola xestión y edición de más de diez proyectos musicales con proyección pública suficiente: 15 puntos.

Trayectoria bien consolidada, cola xestión y edición d’ente seis a diez proyectos musicales con proyección pública suficiente: 10 puntos.

Trayectoria suficientemente consolidada, cola xestión y edición d’ente tres a cinco proyectos editoriales con proyección pública suficiente: 5 puntos.

Trayectoria non consolidada: 1 puntu.

Trayectoria artística del grupu o cantante: hasta un máximu de 15 puntos, indicándose:

Artista o grupu con abondante obra conocida, amás de poles sos actuaciones en directu, por tener pelo menos tres discos grabaos o qu’algamaran el Premiu al Meyor Cantar o otros premios musicales de prestixu reconocíu: 15 puntos.

Artista o grupu con obra conocida, amás de poles sos actuaciones en directu, por tener pelo menos un discu grabáu: 10 puntos.

Artista o grupu con escasa obra conocida, fundamentalmente poles sos actuaciones en directu: 7 puntos.

Artista o grupu ensin obra conocida: 5 puntos.

Grau de corrección llingüística na realización del proyectu: hasta un máximu de 20 puntos, con esti detalle:

Escelente corrección ortográfica, sintáctica y riqueza léxica: 20 puntos.

Bona corrección ortográfica, sintáctica y riqueza léxica: 10 puntos.

Suficiente corrección ortográfica y sintáctica: 5 puntos.

Insuficiente corrección ortográfica y sintáctica: 0 puntos.

9.—Pagu de la subvención

1. Con calter xeneral, l’abonu de les subvenciones va facese desque se xustifique na forma qu’establez la base decimocuarta de la Resolución de la Conseyería d’Educación, Cultura y Deporte de 20 de xunu del 2014, modificada por Resolución de 1 de xunetu del 2015, de la Conseyería d’Educación, Cultura y Deporte, pente medies de tresferencia bancaria a la cuenta asignada pola entidá beneficiaria.

2. Sicasí lo que se dispón nel apartáu anterior, con calter escepcional nesta convocatoria d’anguaño, y acordies colo que dispón la base decimosesta de la Resolución de la Conseyería d’Educación, Cultura y Deporte de 20 de xunu del 2014, modificada por Resolución de 1 de xunetu del 2015, de la Conseyería d’Educación, Cultura y Deporte, les subvenciones d’importe inferior a seis mil diez euros (6.010 €) van abonase de manera automática desque la Ilma. Conseyera d’Educación, Cultura y Deporte firme la resolución de concesión.

Les subvenciones d’importe superior a seis mil diez euros (6.010 €) van abonase previa pitición y presentación de garantía, acordies colo que dispón l’artículu 12 del Decretu 71/1992, de 29 d’ochobre, que regula’l Reglamentu Xeneral de Concesión de Subvenciones, nos términos de les resoluciones de la Conseyería de Facienda de fecha 19 de marzu y 30 de xunetu del 2001 de modificación de la Resolución de fecha 11 de febreru del 2000, poles que se regula’l Réxime de Garantíes pal Abonu Anticipáu de Subvenciones.

En tolos casos, pa proceder al pagu de la subvención concedida ríquese la presentación del certificáu del órganu correspondiente qu’acreite tar al corriente de les obligaciones tributaries y cola Seguridá Social, y nun tener deudes cola Facienda del Principáu d’Asturies, sacante cuando la cuantía de la subvención, por beneficiariu y añu nun pase de 3.005,06 €, tal y como s’establez n’artículu 10.3 d) del Decretu 71/92, de 29 d’ochobre, que regula’l Réxime Xeneral de Concesión de Subvenciones.

En cualesquier casu, l’abonu anticipáu de la subvención nun esime de la obligación d’acreitar en plazu’l cumplimientu de les condiciones establecíes na resolución de concesión.

10.—Xustificación de la subvención

La xustificación ha facese na forma establecida na base XIV de la Resolución de la Conseyería d’Educación, Cultura y Deporte de 20 de xunu del 2014, pola que s’aprueben les bases reguladores de la concesión de subvenciones pa la promoción de la música n’asturianu y en gallego-asturianum en réxime de concurrencia competitiva, modificada por Resolución de 1 de xunetu del 2015, de la Conseyería d’Educación, Cultura y Deporte, pol sistema de cuenta xustificativa; en concreto, la relación clasificada de gastos y inversiones de l’actividá ha presentase según modelu que figura como Anexu II a esta convocatoria.

Como muestra de l’actividá subvencionada ye menester axuntar a la xustificación 25 exemplares de la obra editada en CD o DVD; nel casu d’obres editaes en soporte dixital, ha incluyise soporte físicu y una muestra escrita na que queden recoyíes les característiques finales del proyectu subvencionáu.

El plazu máximu pa la xustificación de les ayudas concedíes va ser el 4 d’avientu del 2015.

11.—Revocación, reintegru y réxime de sanciones

La revocación, reintegru y el réxime de sanciones va llevase alantre d’alcuerdo a lo qu’establez la base XIX de la Resolución de la Conseyería d’Educación, Cultura y Deporte de 20 de xunu del 2014 pola que s’aprueben les bases reguladores de la concesión de subvenciones pa la promoción de la música n’asturianu y en gallego-asturianu, modificada por Resolución de 1 de xunetu del 2015 de la Conseyería d’Educación, Cultura y Deporte.

Atendiendo a lo dispuesto na mentada base XIX, l’incumplimientu del proyectu superior al 50% va suponer la revocación total de la subvención concedida.

Tercero.—Disponer la publicación d’esta Resolución nel Boletín Oficial del Principáu d’Asturies.

Esti actu termina la vía alministrativa y contra’l mesmu pue interponese recursu contencioso-alministrativu ante la Sala de lo Contencioso-Alministrativu del Tribunal Superior de Xusticia del Principáu d’Asturies nel plazu de dos meses contaos dende’l día siguiente al de la so publicación nel Boletín Oficial del Principáu d’Asturies, ensin perxuiciu de la posibilidá d’interposición previa del recursu potestativu de reposición ante la Ilma. Sra. Conseyera d’Educación, Cultura y Deporte nel plazu d’un mes a contar dende’l día siguiente al de la so publicación nel Boletín Oficial del Principáu d’Asturies, nun pudiendo presentase al empar dambos recursos, acordies colo qu’establez l’artículu 28 de la Llei del Principáu d’Asturies 2/1995, de 13 de marzu, sobre réxime xurídicu de l’Alministración, y nel artículu 116 de la Llei 30/1992, de 26 de payares, de réxime xurídicu de les Alministraciones Públiques y del procedimientu alministrativu común, y ensin perxuiciu de que los interesaos puedan exercitar cualesquier otru que consideren procedente.

Oviedo, 14 de xunetu de 2015.—La Conseyera d’Educación, Cultura y Deporte, Ana González Rodríguez.—Cód. 2015-12108.

(Modelu de solicitú, anexu I).

(Relación clasificada de gastos, anexu II).

Ver imagen de la disposición

Ver imagen de la disposición

Ver imagen de la disposición

Disposición anterior | Disposición siguiente

Información sobre el documento

© Copyright 2006. Gobierno del Principado de Asturias