Buscar en el BOPA :

Consultar una disposición

Boletín Nº 55 del lunes 22 de marzo de 2021

OTRAS DISPOSICIONES

CONSEYERÍA D'EDUCACIÓN

Resolución de 19 de febreru de 2021, de la Conseyería d’Educación, pola que se convoquen les pruebes de certificación de llingua asturiana del añu 2021 nel Principáu d’Asturies.

L’artículu 3.3. de la Constitución Española determina que la riqueza de les distintes modalidaes llingüístiques d’España ye un patrimoniu cultural que va ser oxetu d’especial respetu y protección.

La Carta Europea de Llingües Minoritaries y Rexonales de 5 de payares de 1992, ratificada por España’l 2 de febreru del 2001, espón n’artículu 7.1. apartáu f) que los Estaos signatarios van basar la so política, la so llexislación y la so práctica en materia de llingües rexonales o minoritaries, ente otros oxetivos, en “la provisión de formes y medios afayadizos pa la enseñanza y l’estudiu de les llingües rexonales o minoritaries en tolos niveles”.

En desenvolvimientu del artículu 4 del Estatutu d’Autonomía del Principáu d’Asturies dictóse la Llei del Principáu d’Asturies 1/1998, de 23 de marzu, d’Usu y Promoción del Bable/Asturianu, na que, ente otres cuestiones, encárense los aspectos rellacionaos cola enseñanza, estableciendo que’l Principáu d’Asturies va asegurar la enseñanza del bable/asturianu y va promover el so usu dientro del sistema educativu. Amás, nel so artículu 11, referíu a titulaciones, dispónse que’l Principáu d’Asturies va establecer: a) Les titulaciones necesaries pa impartir la enseñanza del bable/asturianu; b) Titulaciones y certificaciones qu’acreíten la conocencia del bable/asturianu.

Per otru llau, el Conseyu d’Europa, nel Marcu Común Européu de Referencia pa les Llingües, establez directrices tanto pal aprendimientu de llingües como pa la valoración de la competencia nes distintes llingües de falantes. Estes pautes van ser un referente clave nel establecimientu de los distintos niveles de competencia de la llingua asturiana.

Pa llevar alantre’l cumplimientu d’estes directrices, desenvuélvese’l Decretu 47/2019, de 21 de xunu, pol que s’establecen los niveles de competencia nel usu de la llingua asturiana y se regula la prueba de certificación correspondiente a esos niveles adaptaos al Marcu Común Européu de Referencia de les Llingües, que va ufiertar la posibilidá d’adquirir, d’alcuerdu coles sos necesidaes y a lo llargo de la vida, diversos niveles de competencia en llingua asturiana. Esti Decretu determina tamién que va ser responsabilidá de la Conseyería competente en materia de política llingüística la organización y xestión d’esa prueba de certificación.

La Resolución del 23 de xineru del 2020, de la Consejería de Cultura, Política Llingüística y Turismu, determina que l’establecimientu de les llinies prioritaries en materia de política llingüística amás de la coordinación d’actuaciones en materia de titulaciones y certificaciones en llingua asturiana ye competencia de la Conseyería de Cultura, Política Llingüística y Turismu, anque razones d’eficacia y de rigor na xestión de los recursos públicos aconseyen que la convocatoria, ellaboración, alministración, evaluación y calificación de les pruebes pa la obtención de los certificaos de los niveles de la llingua asturiana y la espedición d’esos certificaos y les sos equivalencies la realice la Dirección Xeneral d’Ordenación, Evaluación y Equidá Educativa de la Conseyería d’Educación, en beneficiu d’una mayor eficiencia del gastu públicu. Con esta resolución procédese a la delegación de competencies d’una conseyería a otra pa llevar alantre la organización y xestión de la prueba.

L’artículu 1.3 del Decretu 47/2019, de 21 de xunu, establez los niveles competenciales Básicu A1, Básicu A2, Intermediu B1, Intermediu B2 y Avanzáu C1, y el so artículu 3 determina que caún de los niveles tienen qu’integrar les cinco actividaes de llingua siguientes: comprensión de testos orales, comprensión de testos escritos, producción y coproducción de testos orales, producción y coproducción de testos escritos y mediación, y va garrar como referencia los oxetivos, les competencies, los conteníos y los criterios d’evaluación establecíos pa los distintos niveles del Decretu mentáu.

Esti mesmu Decretu nel so artículu 4.1. determina que pal llogru del certificáu de los niveles de la llingua asturiana va ser menester superar una prueba de certificación. Asina mesmo, l’artículu 13 estipula que van convocase les pruebes específiques de certificación, polo menos, una vez al añu pa un mínimu d’ún de los niveles.

Nesti cursu escolar, y nesta resolución de convocatoria, va ufiertase la posibilidá de certificación en nivel Intermediu B2 y nel nivel Avanzáu C1.

En virtú de lo anterior, pa la organización de les pruebes de certificación de lllingua asturiana nel añu 2021 va tase a lo dispuesto nel mentáu Decretu 47/2019, de 21 de xunu, y nos anexos d’esta resolución de convocatoria.

Por too esto, vistos el Decretu 82/2019, de 30 d’agostu, pol que s’establez la estructura orgánica básica de la Conseyería d’Educación y l’artículu 14 de la Llei 2/1995, de 13 de marzu, sobre Réxime Xurídicu de l’Alministración del Principáu d’Asturies,

RESUELVO

Primero.—Convocar les pruebes de certificación de llingua asturiana del añu 2021, nel Principáu d’Asturies, d’alcuerdu colo establecío en Decretu 47/2019, de 21 de xunu, pol que s’establecen los niveles de competencia nel usu de la llingua asturiana y se regula la prueba de certificación correspondiente a esos niveles adaptaos al Marcu Común Européu de Referencia de les Llingües.

Segundo.—Aprobar los calendarios d’almisión y inscripción y de realización de les pruebes de certificación, amás de la llista de centros onde se va facer la inscripción y se van desenvolver les mesmes, y que figuren nos anexos II y III respectivamente, d’esta resolución.

Contra esta Resolución, que remata la vía alministrativa, pue interponese recursu contencioso-alministrativu énte la Sala de lo Contencioso-Alministrativo del Tribunal Superior de Xusticia del Principáu d’Asturies, nel plazu de dos meses, cuntaos dende l’otru día de publicase, ensin perxuiciu de la posibilidá d’interposición previa del recursu potestativu de reposición énte la conseyera d’Educación nel plazu d’un mes, cuntáu dende l’otru día de publicase, ensin que puedan simultaniase dambos recursos, d’alcuerdu colo establecío n’artículu 28 de la Llei del Principáu d’Asturies 2/1995, de 13 de marzu, sobre Réxime Xurídicu de l’Alministración del Principáu d’Asturies, y n’artículu 123 de la Llei 39/2015, de 1 d’ochobre, del Procedimientu Alministrativu Común de les Alministraciones Públiques, y ensin perxuiciu de que les persones interesaes puedan exercitar cualquier otru recursu que-yos paeza oportunu.

En Oviedo/Uviéu, a 19 de febreru de 2021.—La Directora Xeneral d’Ordenación, Evaluación y Equidá Educativa (por delegación. Artículu cuartu, lletra b. Resolución de 25 de payares de 2019. BOPA de 5/12/2019).—Cód. 2021-02274.

Anexu I

CONVOCATORIA DE LES PRUEBES DE CERTIFICACIÓN DE LLINGUA ASTURIANA DEL AÑU 2021

Primero.—Oxetu y ámbitu d’aplicación.

Esta resolución tien como oxetu convocar les pruebes de certificación de llingua asturiana de los niveles de competencia Intermediu B2 y Avanzáu C1 nel Principáu d’Asturies.

Segundo.—Finalidá de les pruebes.

La finalidá de les pruebes de certificación de llingua asturiana va ser la recoyida de datos válidos y fiables sobre l’actuación de les persones aspirantes, l’análisis d’esos datos y la emisión d’un xuiciu sobre’l nivel de competencia d’aquelles que dexe, nel so casu, la certificación de competencies nel usu de la llingua asturiana nos niveles de competencia Intermediu B2 y Avanzáu C1.

Tercero.—Convocatoria.

1. El Decretu 47/2019, de 21 de xunu, establez que les pruebes de certificación de niveles de llingua asturiana van entamase polo menos una vez al añu pa un mínimu d’ún de los niveles.

2. Nel 2021 va celebrase una única convocatoria de les pruebes de certificación de llingua asturiana de los niveles de competencia Intermediu B2 y Avanzáu C1, nes feches que figuren nos calendarios que s’inxerten n’anexu II, y con un ámbitu d’aplicación que va ser la Comunidá Autónoma del Principáu d’Asturies.

Cuarto.—Requisitos y persones destinataries.

1. Van poder presentase a la prueba de certificación de llingua asturiana del nivel de competencia Intermediu B2 y Avanzáu C1 quien tengan polo menos dieciséis años o los faigan nel añu 2021.

2. El personal docente o aquelles persones que participaren na organización, la ellaboración, l’alministración y la evaluación de les pruebes, en cualesquiera de los sos estadios, nun van poder inscribise nes pruebes de certificación.

Quinto.—Procesos d’almisión y inscripción de persones aspirantes.

1. Establécense dos fases: una primera d’almisión pa determinar si la persona candidata tien plaza o non d’alcuerdu al cupu establecíu, y una segunda, onde va haber que pagar el preciu públicu, cola que se va inscribir na prueba.

2. Les solicitúes d’almisión y inscripción nes pruebes de certificación de llingua asturiana han presentase nos plazos afitaos nel calendariu establecíu n’anexu II a) y han axustase al modelu normalizáu disponible na sede electrónica de l’Alministración del Principáu d’Asturies https://sede.asturias.es, que se va poder obtener introduciendo’l códigu de ficha de serviciu CERT0055T01 nel buscador de la cabecera (asitiáu na parte cimera derecha), acompañáu de la documentación que s’indica n’artículu séptimu d’esti anexu.

3. La solicitú d’almisión nes pruebes de certificación de llingua asturiana del añu 2021 ha presentase nos centros d’inscripción que se rellacionen n’anexu III a), ensin perxuiciu de lo establecío n’artículu 16.4 de la Llei 39/2015, de 1 d’ochobre, del Procedimientu Alministrativu Común de les Alministraciones Públiques.

4. Ha presentase una única solicitú por persona y, nel so casu, la solicitú d’adaptación de les pruebes. Namás va poder escoyese ún de los dos niveles de competencia ufiertaos. Presentar más d’una solicitú por persona o conseñar más d’ún nivel na solicitú va llevar a la esclusión del procesu d’inscripción.

5. L’almisión provisional nes pruebes de certificación de llingua asturiana va publicase nel portal educativu Educastur y nos centros d’inscripción. D’alcuerdu cola Llei Orgánica 3/2018, de 5 d’avientu, de Protección de Datos Personales y garantía de los derechos dixitales, l’accesu a la consulta dixital de la publicación va riquir una clave personalizada que va unviase per SMS al teléfonu móvil facilitáu pola persona interesada na so solicitú d’inscripción. De nun facilitase esi datu na solicitú, la persona interesada va poder conocer l’estáu de la so almisión, previa identificación, na secretaría del centru. Contra esa almisión van poder facese alegaciones énte les persones titulares de les direcciones de los centros nel plazu establecíu. Depués van publicase, nel portal educativu Educastur y nos centros d’inscripción, les llistes d’almisión, tal como se contempla nel calendariu del anexu II a).

6. Les persones aspirantes con dalguna discapacidá y/o TDAH que precisen dalguna clas d’adaptación posible de tiempu y/o medios pa la realización de la prueba de competencia xeneral han formular el correspondiente pidimientu concretu de la que soliciten l’almisión rellenando’l documentu, preparáu al efectu, axuntu a la solicitú d’almisión. Esi documentu ye imprescindible pa poder realizar l’adaptación d’alcuerdu coles necesidaes de la persona solicitante.

7. Les persones aspirantes con plaza dientro de cupu van tener que materializar la inscripción pagando la tasa de preciu públicu nos plazos afitaos nel calendariu establecíu n’anexu II a) y presentando nes secretaríes de los centros d’inscripción el resguardu de realizar esi pagu.

8. Nel calendariu establecíu n’anexu II a) va publicase la llista provisional de persones aspirantes inscrites a les pruebes de certificación de llingua asturiana. Contra esa inscripción van poder facese alegaciones énte les persones titulares de les direcciones de los centros nel plazu establecíu.

9. Depués van publicase, nel portal educativu Educastur y nos centros d’inscripción, les llistes definitives de persones inscrites, tal como que se contempla nel calendariu del anexu II a).

Sesto.—Axudicación de places.

1. Determínase un cupu d’almisión de 300 persones pal nivel Intermediu B2 y 300 persones pal nivel Avanzáu C1, que se van establecer cola ordenación alfabética de les solicitúes d’almisión recibíes y d’alcuerdu col resultáu del sortéu públicu y únicu, previstu pa resolver empates nel procedimientu d’almisión d’alumnáu en centros docentes non universitarios públicos y privaos concertaos del Principáu d’Asturies pal cursu 2020-2021, d’alcuerdu colo establecío n’artículu 11.3 de la Resolución de 19 de febreru del 2014, de la Conseyería d’Educación, Cultura y Deporte, pola que s’aprueba l’almisión del alumnáu en centros docentes non universitarios públicos y privaos concertaos del Principáu d’Asturies. Según se recueye n’acta de la sesión celebrada’l 22 de mayu de 2020, el resultáu d’esi sortéu foi esti:

— Dos primeres lletres del primer apellíu: DS.

— Sentíu de la ordenación alfabética: de “A” a “Z”.

Séptimo.—Documentación.

1. A la solicitú d’almisión han acompañase estos documentos:

a) Fotocopia compulsada del Documentu Nacional d’Identidá, Pasaporte o cualquier otru documentu reconocíu llegalmente, en vigor, qu’acreíte la identidá y la edá de la persona aspirante. Nun va ser menester presentar fotocopia del Documentu Nacional d’Identidá, sacante que conste nel procedimientu la oposición espresa de la persona interesada pa que d’alcuerdu col artículu 28.2 de la Llei 39/2015, de 1 d’ochobre, del Procedimientu Alministrativu Común de les Alministraciones Públiques, se consulte o obtenga esi documentu poles Alministraciones Públiques al traviés de les plataformes d’intermediación de datos o otros sistemes electrónicos habilitaos al efectu.

b) Desque la persona aspirante tea almitida y llogre plaza na prueba de certificación de llingua asturiana, xustificante del pagu del preciu públicu que primero ha ingresase en metálico en cualquiera de les entidaes bancaries collaboradores del Principáu d’Asturies col orixinal del impresu normalizáu 046, que va poder obtenese dende la Oficina Virtual de los Servicios Tributarios https://www.tributasenasturias.es (entidaes financieres collaboradores: BBVA, Banco Santander, Banco Sabadell, Liberbank, Caja Rural de Asturias, La Caixa). El pagu de la tasa d’inscripción tamién va poder realizase per Internet en https://www.tributasenasturias.es, desque se rellene online’l documentu 046, executando les instrucciones que señala la páxina web pa realizar el pagu. El modelu 046 rellenáu convenientemente, y en quedando pagáu, val como resguardu del pagu fechu, sacante nel pagu per Internet, y nesi casu’l xustificante de pagu telemáticu tien que se presentar acompañáu del modelu 046, anque en nengún casu va poder suponer la sustitución del trámite de presentación, en tiempu y forma, de la solicitú d’inscripción mentada.

c) A los efectos de bonificaciones y exenciones pola condición de familia numberosa, va aplicase al preciu públicu establecíu lo dispuesto na Llei 40/2003, de 18 de payares, de Protección a les Families Numberoses.

d) Les víctimes d’actos terroristes, los sos cónxugues y fíos/es, van tar quitos del pagu del preciu públicu d’alcuerdu cola Llei 32/1999, de 8 d’ochobre, de Solidaridá coles víctimes del terrorismu. La condición de víctima ha acreitase cola resolución alministrativa correspondiente. Nel casu de cónxugue y fíos/es, ha axuntase fotocopia del llibru de familia.

e) Les persones aspirantes que presenten una discapacidá reconocida igual o superior al 33% nun van tener obligación de pagar el preciu públicu establecíu por Decretu 192/2019, de 24 d’ochobre, pol que s’establez el preciu públicu pola inscripción nes pruebes de certificación de los niveles de competencia nel usu de la llingua asturiana.

f) Les persones con dalguna discapacidá que soliciten dalguna clas d’adaptación posible de tiempu y/o medios pa la realización de la prueba de certificación de llingua asturiana han xustificalo. Pa eso han axuntar a la so solicitú’l certificáu acreitativu de la clas y del grau de discapacidá espedíu pola autoridá competente amás del pidimientu concretu de l’adaptación solicitada nel documentu preparáu al efectu. D’alcuerdu col artículu 28.2 de la Llei 39/2015, de 1 d’ochobre, del Procedimientu Alministrativu Común de les Alministraciones Públiques, va presumise que la consulta o obtención ta autorizada pola persona interesada a nun ser que conste nel procedimientu la so oposición espresa.

g) Les persones con Trestornu por Déficit d’Atención y Hiperactividá (TDAH) que soliciten dalguna clas d’adaptación posible de tiempu y/o medios pa la realización de la prueba de certificación de llingua asturiana han axuntar a la so solicitú, amás del pidimientu concretu de l’adaptación solicitada, l’informe médicu qu’acreíte’l so diagnósticu clínicu.

2. Les secretaríes de los centros d’inscripción van facilitar a les persones interesaes en realizar les pruebes de certificación de llingua asturiana la información y la orientación necesaries, han comprobar que la so solicitú d’almisión tea bien rellenada y que s’axunten los documentos que se precisen en cada casu.

Octavo.—Estructura de les pruebes de certificación de competencia xeneral.

1. Les pruebes de certificación de llingua asturiana van midir el grau de dominiu del candidatu o de la candidata nel usu de la llingua asturiana y van ser evaluaes garrando como referencia los oxetivos, les competencies, los conteníos y los criterios d’evaluación establecíos pa esti nivel nel Decretu 47/2019, de 21 de xunu.

2. Les pruebes de certificación de llingua asturiana van constar de cinco partes independientes rellacionaes coles actividaes de llingua de:

a) Comprensión de testos escritos;

b) Compresión de testos orales;

c) Producción y coproducción de testos escritos;

d) Producción y coproducción de testos orales;

e) Mediación.

3. Los candidatos y les candidates van poder realizar toles partes de que consta la prueba de certificación de llingua asturiana ensin que seya menester la realización o superación previa de dalguna d’elles.

4. La Dirección Xeneral competente en materia d’Ordenación Académica va publicar nel portal educativu Educastur un documentu d’especificaciones de la prueba de certificación de llingua asturiana con orientaciones pa la realización de les mesmes.

Noveno.—Realización de les pruebes de certificación de llingua asturiana.

1. Les persones aspirantes han dir provistes del Documentu Nacional d’Identidá (DNI), Pasaporte o cualquier otru documentu llegalmente reconocíu en vigor qu’acreíte abondo la so identidá y edá.

2. Los exercicios de les cinco partes que componen la prueba de certificación de llingua asturiana van realizase en dos bloques. Nel bloque 1 van facese los exercicios correspondientes a les partes de comprensión de testos escritos, de compresión de testos orales y de producción y coproducción de testos escritos; y nel bloque 2 van realizase los exercicios correspondientes a la parte de producción y coproducción de testos orales y a la parte de mediación.

3. Los exercicios correspondientes al bloque 1 van realizase nel día y horariu que s’especifica n’anexu II d’esta resolución. Les sedes de realización tanto del bloque 1 como del bloque 2 van ser designaes pola Dirección Xeneral competente en materia d’Ordenación académica polo menos dos selmanes primero de facese y van publicase nel portal educativu https://www.educastur.es/.

4. El bloque 2 va desenvolvese en dellos díes. Polo menos 24 hores primero d’empezar esta parte de la prueba, la comisión evaluadora va dar a conocer a les persones aspirantes el tramu horariu y el sitiu onde se van realizar los exercicios pa cada día. Esta información va tar disponible tamién nel portal educativu Educastur. Esta publicación va realizase d’alcuerdu cola Llei Orgánica 3/2018, de 5 d’avientu, de Protección de Datos Personales y garantía de los derechos dixitales. Cada aspirante ha comprobar na publicación el sitiu, día y el tramu horariu nel que lu convoquen pa la realización d’esta parte de la prueba.

Décimo.—Alministración, evaluación y calificación de les pruebes de certificación de llingua asturiana.

1. Han nomase les comisiones evaluadores que seyan menester pa la xestión, alministración, evaluación y calificación de la prueba de certificación de llingua asturiana.

2. El director o la directora del centru de realización va poner a disposición de les comisiones evaluadores los espedientes d’inscripción de quien vaigan realizar les pruebes de certificación de llingua asturiana, amás de les llistes y cualquier otru material que seya menester pal desenvolvimientu correctu de les pruebes.

3. Caúna de les cinco partes de que consta la prueba de certificación de llingua asturiana va valorase usando una escala de 0 a 10 puntos, con un decimal.

4. La calificación final de les pruebes de certificación de llingua asturiana del nivel Intermediu B2 va espresase nos términos de “Aptu”, “Non aptu” y “Non presentáu”, otorgándose la calificación de “Aptu” a quien sacaren polo menos un 6 nel promediu de calificaciones de les 5 partes de la presente convocatoria, calculáu esti con redondéu a la décima, y siempre que se verifique la condición de cuntar con una puntuación de 5 o más puntos en caúna de les partes. La calificación final de “Non presentáu” va corresponder a les persones que nun realicen nenguna de les partes de la prueba. La validez de les calificaciones namás tendrá valir na convocatoria del añu académicu presente.

5. De les sesiones d’evaluación y calificación desenvueltes va llevantase acta. L’acta de calificación ha cubrise según el modelu de l’aplicación corporativa SAUCE qu’ha reflexar la puntuación y calificación llograda poles persones aspirantes en cada parte de la prueba de certificación de llingua asturiana y la so calificación final. L’acta de la sesión d’evaluación y l’acta de calificación han tar firmaes por toles persones integrantes de la comisión evaluadora.

6. Les calificaciones sacaes nes pruebes de certificación de llingua asturiana van grabase al traviés de l’aplicación corporativa SAUCE y d’alcuerdu colos procedimientos pal so usu.

7. Una copia de caúna de les actes de calificación ha publicala’l centru de realización onde se realizare la prueba de certificación de llingua asturiana d’alcuerdu cola normativa vixente sobre protección de datos.

Decimoprimero.—Publicación de resultaos y reclamación contra les calificaciones.

1. Los resultaos de les pruebes van facese públicos d’alcuerdu colo qu’establez la llexislación vixente en materia de protección de datos de calter personal y, en cualquier casu, colo establecío na disposición adicional ventésima tercera de la Llei Orgánica 2/2006, de 3 de mayu, d’Educación.

2. Les persones aspirantes, o los sos representantes llegales, van tener derechu a conocer les sos calificaciones parciales nes distintes actividaes de llingua, amás d’acceder a los sos exámenes y, nel supuestu de que depués de les aclaraciones correspondientes de la comisión evaluadora exista desalcuerdu cola calificación final otorgada, a presentar reclamación na secretaría del centru onde se fixo la prueba. Esa reclamación va poder presentase nel plazu de trés díes hábiles cuntaos a partir de la fecha de publicación de les calificaciones.

3. Les reclamaciones han dirixise a la persona que presida la comisión evaluadora que, depués del informe d’esa comisión y nel plazu máximu de dos díes hábiles, va resolver, modificando o ratificando la calificación.

4. La resolución de reclamación ha ser motivada, d’alcuerdu colos criterios d’evaluación y calificación que s’establecieren pa caún de los exercicios de la prueba de certificación de llingua asturiana, y va facese constar si ratifica o modifica la calificación otorgada.

5. La presidencia de la comisión evaluadora va resolver la reclamación presentada, per escrito y nel plazu máximu de dos díes hábiles, cuntaos a partir del otru día de celebrase la sesión estraordinaria d’evaluación.

6. Contra la resolución de la reclamación va poder interponese recursu d’alzada énte la persona titular de la Conseyería competente en materia d’educación, nel plazu d’un mes a partir del día siguiente a aquel en que se faiga la notificación indicada n’apartáu anterior. Amás, nos 10 díes posteriores a esa notificación, la persona reclamante va tener accesu a les pruebes sobre les que se formuló la reclamación. La resolución del recursu d’alzada va poner fin a la vía alministrativa.

7. Nel casu de que dalguna persona interesada interponga recursu d’alzada, la persona titular de la dirección del centru onde realizó la prueba de certificación de llingua asturiana va unviar a la Secretaría Xeneral Técnica de la Conseyería competente en materia d’educación l’espediente de reclamación, integráu por estos documentos:

a) Exercicios realizaos pol candidatu o la candidata y documentos d’evaluación de les destreces orales;

b) Solicitú de reclamación;

c) Recibí de la persona reclamante o acuse de recibu de la comunicación de la resolución de la reclamación;

d) Resolución motivada;

e) Copia de les actes d’evaluación y de calificación de la prueba.

Decimosegundo.—Certificación d’actividaes de llingua.

1. D’alcuerdu colo establecío n’artículu 4.3 del Decretu 47/2019 de 21 de xunu, a quien nun superen nes pruebes de llingua asturiana les cinco actividaes de llingua del nivel correspondiente, van poder espedi-yos, depués de pidimientu pela so parte, una certificación académica onde se faiga constar que la persona aspirante algamó’l grau de dominiu riquíu en delles de les actividaes de llingua realizaes.

2. Nes certificaciones de les actividaes de llingua, que van espediles el secretariu o la Secretaria de la sede de realización de la prueba según el modelu de l’aplicación corporativa SAUCE, col preste de la presidencia de la comisión evaluadora, va facese constar la puntuación llograda na actividá de llingua correspondiente.

Decimotercero.—Certificáu de superación.

1. Quien superaren la prueba van poder solicitar na secretaría del centru la espedición d’un certificáu acreitativu de superación, que va emitise al traviés de l’aplicación corporativa SAUCE.

Decimocuarto.—Custodia y archivu de documentos.

1. El secretariu o la secretaria del centru de realización en que se desenvolviere la prueba va custodiar les llistes provisionales y definitives de les persones almitíes y escluyíes a la prueba. Tamién va caltener indefinidamente les actes de les sesiones d’evaluación y de calificación.

2. Amás va caltener una copia de caúna de les solicitúes d’inscripción, los exercicios realizaos poles persones aspirantes y demás documentos rellacionaos cola celebración de la prueba nos trés meses siguientes cuntaos a partir de la finalización del plazu de reclamación, sacante los que correspuendan a quien presentaren una reclamación, que se van custodiar de forma indefinida.

Anexu II

PRUEBES DE CERTIFICACIÓN DE LLINGUA ASTURIANA DEL AÑU 2021. CALENDARIOS Y HORARIOS DE LES CONVOCATORIES

a) Calendariu d’inscripción.

Ver boletin en PDF para consultar la tabla

b) Calendariu de realización de les pruebes

Ver boletin en PDF para consultar la tabla

c) Horariu de celebración de les pruebes

Bloque 1: Exercicios correspondientes a les partes de Producción y coproducción de testos escritos, Comprensión de testos orales y Comprensión de testos escritos: horariu y duración.

Bloque 1

Actividá

Nivel Intermediu B2

Nivel Avanzáu C1

Llamamientu d’aspirantes

Distribución de cuadernos y instrucciones

09:00 a 09:30 (30 min)

08:50 a 09:20 (30 min)

Producción y coproducción de testos escritos

09:30 a 11:00 (90 min)

09:20 a 11:00 (100 min)

Posa

15 min

15 min

Llamamientu d’aspirantes

Distribución de cuadernos y instrucciones

11:15 a 11:30 (15 min)

11:15 a 11:30 (15 min)

Comprensión de testos orales

11:30 a 12:15 (45 min)

11:30 a 12:15 (45 min)

Posa

15 min

15 min

Llamamientu d’aspirantes

Distribución de cuadernos y instrucciones

12:30 a 12:45 (15 min)

12:30 a 12:45 (15 min)

Comprensión de testos escritos

12:45 a 13:40 (55 min)

12:45 a 13:50 (65 min)

Bloque 2: Exercicios correspondientes a la parte de producción y coproducción de testos orales y de mediación.

Convocatoria

Bloque 2

La convocatoria pa la realización de los exercicios de les partes de producción y coproducción de testos orales y de mediación va publicase nel centru de realización correspondiente polo menos un día enantes d’empezar esta parte de la prueba.

La convocatoria va incluyir la llista de persones convocaes d’alcuerdu cola Llei Orgánica 3/2018, de 5 d’avientu, de Protección de Datos Personales y garantía de los derechos dixitales pa cada sesión, el sitiu y la franxa horaria en que van ser convocaes, amás de cualquier otra información que se considere necesaria.

Anexu III

RELACIÓN DE CENTROS D’INSCRIPCIÓN DE SOLICITÚES NES PRUEBES DE CERTIFICACIÓN DE LLINGUA ASTURIANA DEL AÑU 2021

IES Aramo

www.iesaramo.es

C/ Trece Roses, 5

Uviéu/Oviedo – CP 33005

985 23 14 10

IES Calderón de la Barca

iescalderondelabarca.com

C/ Calderón de la Barca,

Xixón/Gijón – CP 33204

985 37 05 40

IES Carreño Miranda

www.iescarrenomiranda.es

Avda. Cervantes, 26

Avilés - CP 33402

985 54 39 11

IES Bernaldo de Quirós

www.ibq.es

C/ Frai Paulino Álvarez, s/n

Mieres del Camín - CP 33600

985 46 49 82